Fréttir

Konráð og Kjarkur setja heimsmet

Á nýafstöðnu Landsmóti Hestamanna gerður þeir félagar Konráð Valur Sveinsson og Kjarkur frá Árbæjarhjáleigu sér lítið fyrir og settu heimsmet í 250m skeiði þegar þeir runnu á tímanum 21,15 sekúndur en gamla metið var 21,41 sekúnda sett af Bjarna Bjarnasyni og Heru frá Þóroddsstöðum á Landsmótinu 2016 á Hólum.

En þeir voru ekki þeir einu sem settu heimsmet því metið var slegið þrisvar sinnum á mótinu og í öll þrjú skiptin af Fáksfélögum. Árni Björn Pálsson og Dalvar frá Horni I voru fyrstir til að slá metið en þeir fóru á tímanum 21,30 sekúndur, þá var röðin komin að gullbirninum sjálfum Sigurbirni Bárðarsyni og Vökli frá Tunguhálsi II en þeir gerðu sér lítið fyrir og runnu á tímanum 21,16 sekúndur og ætlaði allt um koll að keyra í brekkunni, annað heimsmet.

En þeir félagar Konráð Valur og Kjarkur ætluðu ekki að gefa sitt eftir en þeir voru með besta tímann eftir fyrri hluta kappreiðanna. Þeir gerðu gott betur en Sigurbjörn og Vökull og fóru á 21,15 sekúndur. Sigurinn og nýtt heimsmet í höfn, innilega til hamingju með það Konráð Valur og Kjarkur.